Përveçse një garanci për portën, ai di edhe të shënojë. Bëhet fjalë për portierin e ri të Kombëtares shqiptare, Etrit Berisha. 23-vjeçari ka shënuar në ndeshjen e kthimit të turit të parë kualifikues të Europa League, ku Kalmari mposhti 4-0 irlandezët e Kliftonvil.

Skuadra suedeze ishte mposhtur 1-0 në takimin e parë, megjithatë për Kalmarin gjithçka ka qenë e thjeshtë në takimin e luajtur në shtëpi. Madje, kualifikimi u sigurua përpara mbylljes së pjesës së parë të takimit, ku vendasit kryesonin 3-0 me gola të Israelson, Gjorgjeviç e Daudas.

Në fundin e ndeshjes kishte vend për lavdi edhe për Berishën. “Gardiani” 23-vjeçar mori përsipër ekzekutimin e një 11-metërshi në minutën e 91-të dhe ai nuk gaboi nga pika e bardhë, duke vulosur shifrat në 4-0.

“Në periudhën e fundit nuk kemi pasur penallti në favor të ekipit tonë, por nëse në të ardhmen do të ketë, unë jam gati t’i ekzekutoj”, ka thënë Berisha për mediat suedeze.

Goli i portierit ka entuziazmuar tifozët e pranishëm në stadium, ndërsa në turin e dytë të Europa League, tashmë Kalmarin e pret sfida me kroatët e NK Osijek.

Kjo tregoi se përveç sigurisë në portë, ku Etrit Berisha është kandidat për një vend titullari së bashku me Samir Ujkanin, portieri i cili ka debutuar në miqësoren me Iranin, mund të jetë një alternativë e mirë edhe për të ekzekutuar 11-metërsha.