Besart Berisha e nisi sezonin e ri me dy gola dhe kjo ka bërë natyrshëm që trajneri i Kombëtares shqiptare, Gianni De Biasi ta cilësonte si kandidat potencial për sulmin kuqezi. Madje, drejtuesi i stolit kishte shprehur dëshirën që ta kishte në dispozicion lojtarin prej miqësores së 14 nëntorit me Kamerunin.

Megjithatë, 27-vjeçari i cili po shkëlqen te Brisbane Roar në A-League-n australiane ka bërë të ditur se nuk ka ndërmend ti përgjigjet ftesave të mundshme.

Gjithçka lidhet me distancën e madhe që futbollistit do ti duhej të përshkonte për të luajtur me përfaqësuesen dhe kjo mund të ndikonte negativisht në paraqitjet e tij në fushë me Shqipërinë, por edhe me klubin ku aktivizohet.

“E respektoj shumë De Biasin dhe e falënderoj për fjalët e mira. Megjithatë, unë nuk e ndryshoj vendimin e marrë, pra që për momentin nuk e kam të mundur të jem pjesë e Kombëtares. E vlerësoj shumë përfaqësuesen dhe shpresoj që një ditë të jem më afër Shqipërisë për të dhënë kontributin tim”, deklaroi Besart Berisha.

Sulmuesi e lë të hapur mundësinë e rikthimit në skuadër, në të ardhmen, kur ndoshta do të luajë sërish në Europë. “Shpresoj që edhe drejtuesit e Kombëtares të kenë të njëjtin mendim dhe të më thërrasin kur të jem duke luajtur diku në Evropë”, nënvijëzoi bomberi që gjatë sezonit të kaluar u shpall golashënuesi më i mirë në kampionatin australian me 19-gola dhe ishte vendimtar në fitimin e titullit të Brisbane Roar.