Shqipëria nuk ka më kohë deri tek ndeshja ndaj Islandës në “Qemal Stafa” për eleminatoret e Botërorit. Trajneri De Biazi dhe kapiteni Cana e dinë se bëhet fjalë për përballje shumë delikate, më shumë sesa ajo ndaj Sllovenisë që vjen më pas. Trajneri nuk flet për formacionin, por thotë se do të sulmojmë.

“Do të luajmë me 4 lojtarë ofensivë dhe nuk besoj se mund të bëhet më shumë sesa kaq. Ndoshta do të dëshironit të luanim me 11 sulmues, por pastaj bëhet e vështirë të mbrohemi. Themi që duhet të marrim 6 pikë në këto dy ndeshje sepse të gjithë e besojmë se kjo është e mundshme, por meqë nuk jemi as Reali i Madridit dhe as Spanja, nuk mund ta quajmë të sigurt. Do të varet nga shumë gjëra. Islanda është më mirë taktikisht se ne, e rrezikshme, por mund t’ia dalim”, De Biazi.

Kapiteni Lorik Cana është edhe më i përmbajtur sesa trajneri, duke thënë se në këto dy ndeshje mund të ndodhë gjithçka. Cana pra e pohon se të paktën në fushën tonë, në këto eleminatore mund të mundim këdo. Le ta fillojmë këtë nga Islanda dhe pastaj le të mendojmë edhe për Slloveninë.