Dje janë zhvilluar dy ndeshje në kuadër të javës së XIII në Raiffeisen Superligë. Skuadra e Besës ka shënuar fitoren e tretë në këtë edicion, të dytën radhazi, duke e mposhtur Trepçën, në stadiumin “Shahin Haxhiislami” në Pejë, me rezultat 2:0.

Kësisoj, Besa pas fitores së javës së kaluar kundër Trepçës’89, ka arritur të tregojë shenjat e këndelljes duke arkëtuar tri pikë tjera tejet të rëndësishme, të cilat e çojnë në pozitën e 8-të në renditje, me 14 pikë.  Golat për Besën i shënuan Diar Miftaraj nga penalltia në minutën e 67-të dhe Jusuf Sabotiq, në minutën e 69-të. Në ndeshjen tjetër, Drenica ka regjistruar barazimin e tetë në këtë edicion. Kësaj radhe skuadra kuqezi nga Skenderaj ka barazuar në shtëpi me Feronikelin, 2:2. Drenica ishte në rrugë të mirë për të shënuar fitore, pasi krijoi epërsi 2:0 me golat e shënuar nga Berat Hyseni, në minutat 49’ e 75’, por futbollistët e Feronikelit arritën që brenda tre minutash të shënojnë dy herë dhe të arkëtojnë një pikë të rëndësishme, nëpërmjet Fidan Gërbeshit (84’) dhe Fitim Halitit (87’).