Tekniku i bardhebluve te Tiranes Huan Sanchez Rubio, është munduar te mbaje te karikuar skuadrën e tij ne prag te sfidës se pare te Kupës Uefa ndaj te ashtuquajturve modeste te Grevenmaher nga Luksemburgu. Për spanjollin kualifikimi arrihet ne 180 minuta dhe nëse kundërshtari është modest e tille është edhe Tirana ne futbollin evropian.

“Për kualifikimin duhet menduar 180 minuta. Futbolli ne kohet e sotme luhet njësoj si ne fushën tende ashtu dhe ne atë kundërshtare dhe ndeshjet trajtohen ne te njëjtën mënyre. Supozohet se Grevenmaher është një ekip modest por edhe ne jemi te tille ne europe. Objektivi ynë është te mundohemi te kalojmë turet hap pas hapi”.

Pavarësisht tre blerjeve te reja tekniku u ka bere thirrje drejtuesve te klubit te afrojnë lojtare te tjerë pasi aktualisht ai ka vetëm 17 lojtare ne dispozicion. Bardheblute e Tiranes janë te paret qe startojnë aventurën e shqiptareve ne Evrope, ne orën 19:00’ ne stadiumin “Qemal Stafa”.