Një “bombë” e vërtetë futbolli ka shpërthyer në Kukës, aty ku skuadra vendase ka shkruar aq bukur një faqe historie në Kupën e Shqipërisë. Kuksianët e trajnerit Cungu shkatërruan Tiranën 4-0 në ndeshjen e parë të turit të dytë të këtij turneu, duke hipotekuar kualifikimin në mes 8 ekipeve më të mirë.

Vendasit patën epërsi të plotë gjatë gjithë ndeshjes dhe shënuan me meritë një gol në pjesën e parë dhe 3 të tjerë në të dytën. Përballë tyre ishte vetëm hija e një skuadre të madhe që quhet Tiranë, që është fituese e Kupës në fuqi si dhe 24 herë kampione e 15 herë fituese e Kupës.

Fillimisht për kuksianët shënoi dy herë Popoviç në minutat 25 e 60-të, ndërsa më pas ishte radha e Igli Allmuçës. Lojtari me numrin 14 thelloi epërsinë në 3-0 në minutën e 86-të dhe pastaj realizoi një gol shumë të bukur në minutën e parafundit.

Në ndeshjet e tjera bie në sy fitorja e Skënderbeut, 1-0 në fushën e Kamzës dhe suksesi po 1-0 i Shkumbinit në Peqin ndaj Vllaznisë.
Luftëtari i Gjirokastrës ia doli të përmbyste shifrat në fushën e tij ndaj Bylisit. Heroi i takimit ishte sulmuesi Nora që realizoi dy herë.
Rezultatet e tjera janë: Apolonia-Kastrioti 1-2, Lushnja-Teuta 0-0, Besa-Flamurtari 0-1 dhe Tomori-Laçi 0-0.