Sulmuesi kosovar Genc Hyseni ka thënë se cilësia e futbollit të Kosovës nuk ka dallim të madh me atë të Shqipërisë dhe Maqedonisë. Skuadra e Hysit është favoritja e tij për t’u shpallur kampione.

“Për nga cilësia futbolli i Kosovës nuk ka ndryshim shumë të madh nga ai i vendeve të rajonit. Futbolli kosovar është në rrugë të mirë. Në këtë kampionat favorite për mua është skuadra e Hysit, por edhe ajo e Ferizajt mund të sjellë befasi në kampionat, në qoftë se nuk do të ketë kurdisje të ndeshjeve”, ka thënë Hyseni.

Sulmuesi që aktualisht aktivizohet në kampionatin e Maqedonisë me skuadrën e Teteks, ka bërë të ditur edhe arsyet pse ka munguar në ndeshjen miqësore që përfaqësuesja e Kosovës e zhvilloi më 17 shkurt për nder të dyvjetorit të pavarësisë së Kosovës.

“Kam marr ftesë nga përzgjedhësi i përfaqësueses, por kam qenë në përgatitje me skuadrën në Ohër. Klubi nuk dëshiroi të më lëshojë, por edhe u kam thënë se nuk mund të vij. Edhe pse vendosa të jam pjesë e përfaqësueses, nuk erdha shkaku se në fillim kisha thënë se klubi nuk po më lëshon”, ka thënë Hyseni duke shtuar: “E çmoj shumë trajnerin Albert Bunjaku, por ai ka bërë disa lëshime, pasi nuk ka ftuar tre futbollistë që aktivizohen në kampionatin e Maqedonisë. Ata e meritojnë të jenë pjesë e përfaqësueses pasi po luajnë në Evropë dhe janë kampionë”.

Sulmuesi me prejardhje nga Ferizaj më herët ka luajtur për skuadrën e vendlindjes, Ferizajn, Gramozin (Shqipëri), Ethnikos Achnan (Qipro), Renovën e Milanon (Maqedoni).

Veton Zymberi