Lëvdatat e përzgjedhësit të Përfaqësueses së Kosovës në Futboll, Albert Bunjakut, e kanë kënaqur tej mase sulmuesin e Flamurtarit, Artan Gashin, i cili ka thënë se këto lëvdata e shtyjnë të punojë edhe më shumë.

“Pas përfundimit të takimit kam biseduar me përzgjedhësin e Përfaqësueses së Kosovës në Futboll. Ai më ka dhënë lëvdata dhe më ka thënë se shumë shpejt mund të jam pjesë e Përfaqësueses së Kosovës, kurse më ka sugjeruar të rikthehem më shumë dhe ta përmirësoj lojën defansive. Prononcimi i Bunjakut në medie më jep vullnet të punoj edhe më shumë”, ka thënë Artan Gashi.

Sulmuesi 26-vjeçar, i cili ka shënuar shtatë gola deri me tash dhe është golashënuesi më i mirë i Flamurtarit, ka shprehur mendimin se edhe më herët e ka merituar të jetë pjesë e përfaqësueses.

“Edhe më herët e kam merituar të jam pjesë e përfaqësueses, por përzgjedhësi nuk ka qenë i informuar për paraqitjet e mia. Unë kam pasur paraqitje të mira vazhdimisht në këtë kampionat, e jo vetëm kundër skuadrës së Trepçës”, ka shtuar ai.

Që nga koha e largimit të sulmuesit Faton Zejnullahu nga skuadra e Flamurtarit, Artan Gashi së bashku me Malsor Gjonbalajn janë duke e bartur barrën kryesore të sulmit në skuadrën e Jusuf Tortoshit. Sulmi i kuqezinjve nga kryeqyteti është i katërti në Raiffesien Superligë me 27 gola të shënuara.

Veton Zymberi